Cultura y Sociedad - 24/01/10

Aragonés, anyo cero

Si hese escrito estas línias fa un anyo, mesmo fa només uns meses, muita gent s’hese pensau que se tratava d’una groma, d’una sanantonada. Ixo, u que m’heva tornau loca. Pero no, no ye asinas. Aragon disposa ya, dimpués de 27 anyos dende l’aprovacion d’o Estatuto d’Autonomia (una vergüenya!) d’una lei que legislará sobre as suyas lenguas minoritárias, u própias, como reça o texto: l’aragonés e o catalan.

Ya en he manifestau as mias discrepáncias en l’anterior articlo e no las tornaré a repetir aquí. Manimenos cal emponderar aquí dos puntos que a lei soluciona de traça definitiva e d’un plumaço: Per un costau clama a las cosas pel suyo nombre, sin eufemismos: ni ‘fablas pirenencas’, ni ‘dialectos altoaragoneses’, ni ‘milenária lengua regional’, como esta semana  un periódico (regional) se referiva a l’aragonés, pero tapoc ‘chapurriau’, ni ‘orienaragonés’ u ‘aragonés oriental’, como pretendevan e pretenden bels sectors e colectivos asaber qué reaccionários. A lei lo deixa firme claro, dos lenguas: aragonés y catalan.

O segundo punto, de gran trascendéncia pa l’aragonés, ye a creacion d’una autoridat cientifica, una Académia (encara no he estomagau o perqué d’una académia pa o catalan). De gran trascendéncia, digo, perque o Consello d’a Fabla Aragonesa –con Francho Nagore a la cabeça– no ha aconseguiu estar-lo en trenta anyos, més que més per la suya manera de treballar, de culas a los verdaders protagonistas de l’aragonés, os patrimonials, defendendo un aragonés irreal escribiu con una ortografia fiera de tot. Pero tapoc a minoritária Sociedat, encara que valient en os suyos planteamientos –no cal olvidar que fue ella qui ubrió o debat– ni sisquiera o Estudio de Filología de Aragón –l’autoproclamada ‘Académia de l’Aragonés’–, que zaga tres anyos dende a constitucion suya encá no’n sabemos res d’as suyas propuestas.

Trascendental perque, si ixe Consejo Asesor fa bien o suyo treballo y en ixa Académia i son o millor d’o millor, per meritos cientificos, as asociacions y os patrimonials con concéncia l’aceptaran de buen implaz. B’havrá una autoridat per primera vez en a história y estoi que a suya primera fayena seria la d’adotar a este idioma d’una ortografia consensuada. Caldrá veyer qué fa Nagore y os suyos seguidors. A grafia de 1987 ye ferida de muerte dende o momento en que a SLA l’ha abandonau (y o EFA tamien, per lo que se’n sona). Dimpués caldrá fablar de codificacion, de normativizacion, pero ixo ye farina d’atra costalla.

Per cuentra, si o Consejo posa os alazez d’una Académia viciada, politiçada, de cosa servirá esta lei, as diferents asociacions le negarán ixa autoridat científica y moral, s’encastillaran en as suyas posicions y o problema será de mal solucionar. Nos la jugamos en poquez dias.

3 comentarios sobre Aragonés, anyo cero

  • No creigo que l’aragonés que escriben Francho Nagore u Chusé Inazio Nabarro, Francho Rodés u Manuel Castán siga «irreal de tot», u a lo menos, no ye menos irreal que l’aragonés escrito por Chusé Raúl Usón, Xavier Tomás, Anchel Conte, Chuan Carlos Bueno u Chusé María Guarido.
    No cal confundir a ortografía con o modelo culto que se preba d’ir construindo, tanto dende o Consello d’a Fabla, dende l’Academia-EFA u dende a SLA. En cualsiquiera d’ixas tres asociacions bi ha patrimonials y neofablans y no veigo que l’aragonés que fan servir en os suyos escritos siga más diferent que os suyos proprios escritos cuan os fan en castellano. A toz ellos les he sentiu charrar en castellano y en aragonés y a toz les he leyiu en castellano y aragonés dende fa más de 10 años (bueno, menos a Castán).
    Creigo que o principal problema de l’aragonés ye que istas tres asociacions, compuestas por chen que estudia l’aragonés, no se quieren posar alredor d’una mesa ta charrar de os problemas de a nuestra luenga y mirar de trobar puntos d’alcuerdo. Tot lo reducen. lo reduciz, á una «tournée de force» á mirar qui gana ista «guerra». Entre meyas l’aragonés se nos amorta.
    Yo por a mia parti, l’unico que soi prebando agora ye d’enfortir a Federación de Ligallos de Fablans de l’aragonés, ta que i podamos arroclar-nos toz os que charramos aragonés, sin parar cuenta de a ortografía que mos cuaque más u mos parixca menos fiera, sino simplament ta cautivar l’argonés y chuntar-mos ta charrar-lo, fendo servir l’animación sociocultural y l’amostranza d’adultos como ferramientas ta ello. Una organización popular unitaria per dencima (u debaxo) de o debate cientifico. Por cierto, me parixe que l’aragonés de Carlos Abril u Liena Palacios no ye millor ni pior que lo de os devanditos.
    Yo, como ciudadano aragonés que preba que no s’amorte l’aragonés, que no preba de tener razón en cosa y que no sabe más filolochía que la que aprendió en o bachillerato, vos demando, á CFA, EFA y SLA que vos posez alredor d’una mesa, en un foro publico, ta debatir sobre o futuro de l’aragonés.
    Si no, humildement pensaré que más d’uno no ye pensando en salvar a nuestra luenga, sino en buscar-se un posillo confortable ta la suya vanidat.

  • Chorche

    Virginia, no sé cuánto tiempo en lebarás en iste mundet de l’aragonés. Te charra un que conoxe isto dende os primers 80. Siguimos trepuzando en o mesmo cantal: una angluzia presonalista grandisma por cualsiquiera que se creye que por aber-ne escrebiu cuatro ringleretas u bel libret en a nuestra luenga ya merexe o posiento «A» d’a nuestra quimerica cademia.
    A ortografía del 87 fue refirmata por a mayoría de los que agora la refusan, enzenegaus en restar a atros importanzia cademica. Ista ye a unica ortografía que en 40 añadas emos siguiu os que refirmabamos y febanos serbir l’aragonés, mesmo neofablans mesmo os patrimonials (fueras de os chesos, con os suyos argumentos). Bien diz «trestalla y benzerás». Pos ixo nos pasa a nusatros.
    Más umildá, más solidaridá y más chenerosidá. Qué me se da a yo qui seiga consellero, cademico u ostias en binagre. Astí lo importán ye l’aragonés. Qui meta debán de l’aragonés atros intreses flaca fabor li fa a la nuestra dolenta luenga.

  • Primero dezir que no soi miembro de o Consello d’a Fabla Aragonesa. No boi á repetir argumentos, pero si contra os regles de 1987 nomás se diz que no balen porque son fieros y puedo dezir lo mesmo d’os que agora parixe que se quieren imponer.

    Una mica de debate:

    http://barrenau.blogspot.com/2010/01/sobre-as-grafias.html

Deja un comentario